کبڈی ورلڈکپ: بین الاقوامی ٹیموں کی پاکستان آمدکا سلسلہ شروع

لاہور (این پی پی) کبڈی ورلڈ کپ 2020 میں شرکت کے لیے تین ممالک کی ٹیمیں پاکستان پہنچ گئیں۔ذرائع ابلاغ کے مطابق کبڈی کے عالمی کپ میں شرکت کے لیے جرمنی، ایران اور آذربائیجان کی ٹیمیں لاہور پہنچ گئیں جن کا اسپورٹس بورڈ پنجاب کے حکام نے علامہ اقبال انٹرنیشنل ایئر پورٹ پر پرتپاک استقبال کیا جب کہ دیگر بین الاقوامی ملکی ٹیمیں ہفتے کو لاہور پہنچیں گی۔صوبائی وزیر کھیل رائے تیمور خان بھٹی نے کہا کہ کبڈی ورلڈ کپ 2020ء میں حصہ لینے والی غیرملکی ٹیموں کو بہترین سہولتیں دیں گے، شائقین کو شاندار مقابلے دیکھنے کو ملیں گے جنہیں وہ مدتوں یاد رکھیں گے، دنیا بھر کی 10 بہترین ٹیمیں ایک دوسرے کے مقابل ہوں گی اور پرزور مقابلے ہوں گے، کبڈی کو فروغ دینے میں کبڈی ورلڈ کپ سنگ میل ثابت ہوگا، کبڈی ورلڈ کپ کے لیے ہماری تیاریاں مکمل ہیں۔واضح رہے کہ کبڈی ورلڈ کپ 2020ء کے 14 مقابلے پنجاب اسٹیڈیم لاہور، 8 مقابلے اقبال اسٹیڈیم فیصل آباد جب کہ 2 مقابلے ظہور الٰہی اسٹیڈیم گجرات میں ہوں گے، کبڈی ورلڈ کپ 9 سے 16 فروری تک منعقد ہوگا، 9 فروری کو پنجاب اسٹیڈیم میں رنگا رنگ افتتاحی تقریب ہوگی۔اُمید ہے ان مقابلوں سے شائقین خوب محظوظ ہوں گے۔

اپنا تبصرہ بھیجیں