عدنان صدیقی کی بدتمیزی پر سرفراز احمد سے معافی

کراچی (این پی پی) کرکٹر سرفراز احمد کا مذاق اڑانے اور ان کی تضحیک کرنے پر لائیو شو کے دوران اداکار عدنان صدیقی نے معافی مانگ لی لیکن اس موقع پر بھی فہد مصطفیٰ نے ڈھٹائی کا مظاہرہ کیا اور اس موضوع کو ہی غیر اہم قرار دے ڈالا۔ گزشتہ دنوں سوشل میڈیا پر ایک ویڈیو وائرل ہوئی تھی جس میں نجی ٹی وی چینل سے نشر ہونے والے گیم شو کے دوران عدنان صدیقی نے سرفراز احمد کے ہکلاکر بولنے کے انداز کا مذاق اڑایا تھا اور ان کی نقل اتاری تھی۔ عدنان صدیقی کی اس حرکت کو سوشل میڈیا پر بے حد تنقید کا نشانہ بنایا گیا تھا اور صارفین نے انہیں آڑے ہاتھوں لیتے ہوئے ان سے سرفراز احمد سے معافی مانگنے کا مطالبہ کیا تھا۔ سوشل میڈیا پر ہونے والی تنقید کے بعد عدنان صدیقی نے گزشتہ روز لائیو شو کے دوران سابق کپتان سے اپنی حرکت کی معافی مانگی لی۔ سوشل میڈیا پر وائرل ہونے والی ویڈیو میں دیکھا جاسکتا ہےعدنان صدیقی کہہ رہے ہیں سرفراز میں آپ کے پرستاروں، آپ کے گھر والوں اور دوستوں سے معذرت چاہتا ہوں، میں قسم کھا کر کہہ رہا ہوں میں نے اس حوالے سے کوئی بات نہیں کی تھی جس سے سرفراز کا یا ان کے دوستوں کا دل دُکھے۔ اس موقع پر سرفراز نے بھی نہایت عاجزی کا مظاہرہ کرتے ہوئے کہا آپ کو کچھ کہنے کی ضرورت نہیں۔ عدنان صدیقی نے کہا، آپ مجھ سے ناراض تو نہیں ہیں نا جس پر سرفراز نے کہا نہیں میں آپ سے ناراض نہیں ہوں۔ تاہم اس دوران شو کے میزبان فہد مصطفیٰ نے مداخلت کرتے ہوئے کہا آپ ہمارے بڑے ہیں آپ ہمیں لائیو تھپڑ بھی ماردیں گے تو کوئی فرق نہیں پڑے گا لہذٰا یہ فضول کی باتیں ہیں، ہم آپ سے معافی مانگتے ہیں کہ لوگ اس طرح کی باتیں کررہے ہیں۔ بعد ازاں انہوں نے ایک بار پھر سرفراز احمد کا اسی انداز میں مذاق اڑایا جس طرح عدنان صدیقی نے کیا تھا۔

اپنا تبصرہ بھیجیں