پاکستان میں پٹرولیم مصنوعات کی قلت کا خدشہ

اسلام آباد(این پی پی) آئندہ ایام میں پاکستان کو پٹرولیم مصنوعات کی قلت کا سامنا ہو سکتا ہے۔ پی ایس او کی جانب سے کی گئی سستی درآمدات کی وجہ سے اگر آئل ریفائنریوں نے پٹرولیم مصنوعات کی پیداوار گھٹا دی تو ان مصنوعات کی قلت ہوسکتی ہے۔ آئل ریفائنریوں نے حکومت کو آگاہ کردیا تھا کہ لاک ڈاؤن کے بعد مارچ اور اپریل میں انہیں 31 بلین روپے کا انوینٹری نقصان ہوا ہے۔آئل ریفائنریوں نے حکومت کو خبردار کردیا تھا کہ کسی بھی ریفائنری کی پیداوار میں کمی؍ بندش کے سنگین اثرات مرتب ہوں گے جس کے نتیجے میں پٹرولیم مصنوعات کی قلت ہوسکتی ہے۔اب آئل ریفائنریوں کو مئی کے ابتدائی دو ہفتوں میں پی ایس او کی جانب سے سستے نرخوں پر درآمدات کی وجہ سے قیمتوں کے ایک اور بحران کا سامنا ہے۔ ان سستے نرخوں کی بنیاد پر جون کے لیے ایکس ریفائنری قیمت کا تعین کیا جائے گا۔

اپنا تبصرہ بھیجیں