امریکا کا پاکستانی F16طیاروں کیلئے 125 ملین ڈالر امدادکا اعلان

واشنگٹن: وزیراعظم عمران خان کے دورہ امریکا کے ثمرات آنا شروع ہوگئے، امریکا نے پاکستان کے ایف 16طیاروں کیلئے تکنیکی اور لاجسٹک سپورٹ کا اعلان کردیا۔ تفصیلات کے مطابق امریکا کی جانب سے تکنیکی اور لاجسٹک سپورٹ کی مدد میں پاکستان کو ایف 16طیاروں کے لیے 125ملین ڈالر فراہم کیے جائیں گے۔

تکنیکی سپورٹ کا اعلان امریکا کی دفاعی سیکیورٹی کو آپریشن ایجنسی نے کیا، تکنیکی سپورٹ فراہم کرنے کی منظوری محکمہ خارجہ نےدی۔

ڈی ایس سی اے کا کہنا ہے کہ اس فیصلے سے امریکی خارجہ پالیسی اور قومی سلامتی کو فائدہ ہوگا۔ امریکی محکمہ خارجہ کے مطابق فیصلے سے برصغیر میں طاقت کا توازن نہیں بگڑے گا۔ یاد رہے گذشتہ دنوں وزیراعظم عمران خان امریکا کے دورے پر تھے، وزیر اعظم پاکستان عمران خان نے وائٹ ہاؤس میں امریکی صدر ڈونلڈ ٹرمپ سے ملاقات کی تھی، امریکی صدر نے مسئلہ کشمیر پر پاکستان بھارت کے مابین ثالثی کی پیش کش کی۔

صدر ٹرمپ نے کہا تھا کہ عمران خان اور میں دونوں نئے لیڈرز ہیں، مسئلہ کشمیر پر دونوں لیڈرز بڑا کردار ادا کر سکتے ہیں، کشمیر اور افغانستان کا مسئلہ حل ہوگا تو پورے خطے میں خوش حالی ہوگی۔

ملاقات کے بعد امریکی صدر نے مشترکہ پریس کانفرنس میں کہا تھا کہ ہم وزیر اعظم عمران خان کا امریکا میں خیرمقدم کرتے ہیں، مسئلہ کشمیر کے حل کے لیے میں کوئی کردار ادا کر سکتا ہوں تو بہت خوشی ہوگی، پاکستان اور بھارت کے درمیان کشیدہ تعلقات کا علم ہے، ملاقات میں پاک بھارت تعلقات میں بہتری کے لیے بھی بات ہوگی۔

اپنا تبصرہ بھیجیں